Uzun müddətlik yay tətilindən sonra işlərini qaldığı yerdən eyni tempdə davam etdirmək bir çox insana çətin gələ bilər. Lakin yay bitdiyinə görə rejiminizi dəyişməyin vaxtı çatıb. Bu yazımızda yay tətilindən iş və ya təhsil həyatınıza uğurlu dönüş etmək üçün 5 tövsiyəni sizə təqdim edirik.
İş otağınızı və masanızı təmizləməkdən başlayın!
Səliqə işinizi həll etməyin açarıdır! Dağınıq otaq işə başlamağa olan həvəsinizi öldürməyə bəs edəcək. Ona görə də, hər şeyə məhz təmizliklə başlayın. Köhnə və lazımsız əşyaları ayırın və əvəzinə yeni əşyalar yerləşdirin. Otağınızın dizaynında dəyişiklik etmək də motivasiyanızı qaldırmağa kömək edə bilər. Bundan sonra isə artıq yenilənmiş kabinetinizdə yeni ləvazimatlardan istifadə etmək üçün səbrsizlənəcəksiniz!
Sosial şəbəkələrdən uzaqlaşın!
Saysız əlaqələrinizdən gələn hər bildirişə cavab vermək məcburiyyətində deyilsiniz! Sosial şəbəkələrdə izləmək və izlənilməyə ara vermək boş zamanınızı artıracaq. Mesajlara cavab verməkdə seçici olmaq, lazımsız bilidirişləri söndürmək bu prosesdə sizə yardımcı olacaqdır. Bəlkə də, otağınızla bərabər telefonunuzda da təmizlik etməlisiniz. Yararsız tətbiqləri və faylları telefonunuzdan silməyi və ya yeniləri ilə əvəz etməyi sınayın. Telefonunuzun köləsi olmayın, onu öz yararınıza istifadə edin!
Düşünmək üçün zaman ayırın.
Özünüzə yeni hədəflər təyin etmək üçün zaman verin. Yeni mövsümdə nələrə nail olmaq istəyirsiniz? Bu suala cavab tapmaq içinizdəki işləmək həvəsini alovlandıracaq. Yeni iş və ya dərs ilinə məqsədli şəkildə başlamaq uğurlu olmağınıza təkan verəcək.
Kiçik şeylərdən başlayın!
Hər şeyi bir dəfədə həll etmək imkansızdır. Bu addım uğursuzluğa, uğursuzluq isə ruh düşkünlüyünə yol açacaqdır. Yeni iş rejiminiz üçün yeni gündəlik plan hazırlayın. İlk olaraq ən az vaxtınızı aparacaq işdən başlamaq məqsədəuyğundur. Gün sonunda isə özünüzə hesabat verin. Planla hərəkət etmək sizə tətildən iş həyatına geri dönməkdə və günlərinizin produktivliyini artırmaqda kömək edəcək.
Tətil adətlərinizə geri dönüşlər edin.
Yay tətili rejiminizdən iş rejiminə qəfil geri dönüş etmək tez yorulmağınıza səbəb ola bilər. Bu səbəbdən istirahətə az da olsa, zaman ayırmaqdan çəkinməyin. “Ediləcəklər siyahısı” hazırlayarkən bütün bu işləri edən insana zaman ayırmağı unutmayın!
İş həyatında motivasiyanızı artırın! başlıqlı yazımıza buradan keçid edə bilərsiniz.
