Oyun adətən boş zamanları daha əyləncəli hala gətirmək, bəzən də yeni bilgilər öyrənmək üçün həyata keçirilən fəaliyyətlərdir. Bir çox hallarda oyunlara aid olan əsas qaydalar, fikirlər və digər elementlər oyun ilə bağlı olmayan başqa sahələrə də tətbiq edilə bilir. Buna “Oyunlaşdırma”, digər deyişlə “Gamification” deyilir.
Digər sahələrdən oyunlaşdırmanın ən primitiv nümunəsi olaraq təhsil sektorunda şagirdlərin çalışmaq üçün motivasiyasının yüksəldilməsi baxımından müəyyən addımlar atılır. “Həftənin ən çalışqan şagirdi” seçilənlər üçün ayrılmış lövhədə adlarının qeyd olunması, kiçik döş nişanları yaxud mükafatla təltif olunması həvəsləndiricidir. Bu, onlar arasında bir növ rəqabət yaradır, dərs zamanı aktiv iştirak etmələrini təmin edir. Oxumağa, çalışmağa təşviq edilən şagirdlər arasında bütün bunların təsiri ilə fəallıq dərəcəsi və sinifin dərsləri mənimsəmə səviyyəsi də yüksəlir.
Marketing sahəsində də oyunlaşdırma anlayışının böyük önəmi var. Məhsulların satışını həyata keçirmək üçün planlı şəkildə reallaşdırılan və eyni zamanda əyləncəli olan taktikadır. Marketinq oyunlaşdırması, doğru istifadə olunduğu zaman olduqca effektivdir.
Oyunlaşdırmanın əsas məqsədi, insanların istənilən hərəkətləri təkrarlamasını artırmaq, oyunlar vasitəsilə onların davranışlarına təsir etməkdir. Oyunun qaydalarına görə lazım olan şərtlərə riayət edərək ən yaxşısı olmaqla sonda mükafatı əldə etmək mümkündür. Nəticə olaraq, şirkət qarşısına qoyduğu hədəflərə asanlıqla çata bilər. Araşdırmalar göstərir ki, oyunlaşdırma, müştəri sədaqətini və işçilərin motivasiyasını artırır.
Oyunlaşdırma taktikasını tətbiq edən şirkətlər araşdırma etməli, hədəf kütləsini yaxşı tanımalı, onları təşviq etmək üçün plan qurmalıdır. Yeni hədəflər qoyaraq bu hədəfləri reallaşdırmaq üçün son tarix müəyyənləşdirməli, işləri qarışıq hala gətirməməlidirlər. Qeyd olunduğu kimi əgər oyun doğru şəkildə qurulub yönləndirilsə, nəticə gözlənilən kimi olacaqdır.
Burada bəzi elementlər eyni olaraq qalmaqdadır. Oyun üçün müəyyən edilmiş sahə, oyunçu, onun bilməli olduğu oyun qaydaları, mükafatlar, səviyyə göstəriciləri, liderlik cədvəli kimi elementlər bu çərçivədə yer alır.
Oyunlaşdırma günümüzdə bir çox markalar tərəfindən geniş istifadə olunur. Həmin markalar arasından 5 şirkət nümunəsi seçilərək oyun taktikaları haqqında məlumat verilmişdir:
Domino’s Pizza
Əsas hədəf kütləsini təşkil edən gənc və yetkinlər üçün mobil pizza sifarişi tətbiqinə oyun əlavə edib. Sifariş vermək üçün seçim edərkən Android və iPhone istifadəçiləri mobil cihazı sallaya bilirlər.
Starbucks
Starbucks “ Mənim Starbucks Mükafatlarım” programı ilə müştərilərinə alış-veriş üçün xərclədikləri hesaba uyğun bal verir. Xərcləmələr artdıqca bu ballar yığılaraq gələcəkdəki alış-verişdə ödəmələrdə nəzərə alınır. Bu, müştərilərin gələcək mükafatlar üçün daha çox xal qazanmağa geri gələcəklərinin nümunəsidir.
Popchips
Popchips mobil oyunlarda oyunçular müəyyən bir səviyyəyə çatdıqdan sonra onlara Popchips çantaları təqdim etmək üçün Kiip şirkəti ilə razılaşdı.
McDonald’s
McDonald’sın tətbiq etdiyi “Monopoliya” adlanan oyun onun gəlirini artıraraq müştərilərinin diqqətini çəkdi. Bu fast food markası satışlarını artırmaqla kifayətlənməyərək müştərilərinə həm məhsullarını dadmaq, həm də əylənmək imkanı yaratdı.
Nike+ Fuelband
Bu markanın seçilən aksesuarı olan Nike+ Fuelband istifadəçilərin hərəkətlərini xüsusi mexanikası vasitəsilə izləyə bilirdi. Bunun üçün ilk olaraq Nike+ tətbiqi endirilməli idi. Alınan statistik rəqəmlər isə istifadəçiyə bildirilirdi.
Mənbə: gamewheel.com
Marketinq gələcəkdə xidmətdədirmi? haqqında məqaləyə nəzər yetirmək üçün buraya klikləyin.
