Biznesinizi insanlara tanıtmaq çox önəmli məsələlərdən biridir. Burada da köməyinizə marketinq çatır. Bu yazını uğurlu marketinq həmlələri ilə bağlı olaraq müzakirə edəcəyik.
Sosial media
Hazırkı dövrdə biznesinizi insanlara tanıtmaq üçün ən ideal yol hər kəsi birləşdirən yer – sosial mediadır. Sosial media aktivliyi ən başlıca həmlə olsa da, sosial mediadan necə istifadə etmək, biznesi necə tanıtmaq, sosial mediadan müştərilərə necə müraciət etmək bu həmlənin dayaq sütunlarıdır.
• Məhsullarınızı reklam etməyin və potensial müştəri toplamanın hansı sosial media platformunda daha rahat və effektiv ola biləcəyini analiz edin. Bu analizi apararkən ətrafımızda hansı platformun daha populyar olduğunu bir kənara qoyub, potensial müştərilərinizin diqqətini harada rahat çəkə biləcəyinizə fokuslanın. Instagram, Facebook və Twitter kimi platformlarla yanaşı, Linkedin, MerchantCircle, Yelp, Pinterest və s. kimi saytlar da bu barədə olduqca əlverişlidir. Bu kimi saytlar ölkəmizdə və regionda çox məşhur olmasa da, bu barədə öncəki illərə nisbətən gözə çarpan irəliləyiş hiss olunur.
• “Giveaway” deyə adlanırılan onlayn marketinq həmləsi də çox sadə olmasına baxmayaraq, geniş kütlələrə çatmaqda yardımçı ola bilər.
• Endirim aksiyalarına qoşulmaq, müəyyən endirim və ya tanıtım həftələri edərək sosial mediada bildirmək (hətta sosial media üzərindən görüb qoşulanlara ayrıcalıqlar təqdim etmək), hashtaglar yaratmaq və ya qoşulmaq da vacib adlandırıla biləcək addımlardandır.
• Rəqiblərinizin sosial media hesablarını izləmək, onların ən çox maraq yaradan və ən az bəyənilən postlarından nəticə çıxarmaq da olduqca faydalıdır.
Bununla bərabər, mütəmadi olaraq anket-sorğu paylaşımları edərək müştərilərin müəyyən məsələlərlə bağlı fikirlərini öyrənmək də olduqca effektivdir.
• Paylaşdığınız post və hekayələrdə vizual effektlərdən istifadə etməyi unutmayın. Yaxşı işlənilmiş vizual effektlər hər zaman diqqət cəlb edir.
• İçərisində olduğunuz sahə haqda müəyyən paylaşımlar etmək (illik statistika və s.) müştərilərə səhifənizi daha maraqlı edə bilər.
Müştərilərinizə danışmağı unutmayın. Hədəfləriniz, müştəri məmnuniyyətini artırmaq üçün göstərdiyiniz cəhdlər sizi güvənilən edir.
Tərəfdaşlıq və sosial tanıtım
Tərəfdaşlıq hər zaman ən uğurlu marketinq strategiyalarından biri hesab olunub. Kiçik bizneslər üçün hər hansı bir layihəyə tərəfdaş olmaq daha çox önəm daşıyır. Lakin bu şans onların əlinə rahat keçmir. Bu səbəblə də, kiçik layihələr hazırlayaraq (daha çox sosial reklam xarakterli) orada hər hansı digər bizneslərlə tərəfdar olmaq daha effektivdir. Bu layihələr sosial bir mövzu haqda broşur paylama, kiçik miqyaslı bir sosial aksiyada (sağlam həyat, təbiəti qorumaq və s. xarakterli) tərəfdaş və ya təşkilatçı olaraq iştirak etmə və s. ola bilər. Unutmamaq lazımdır ki, kiçik bizneslərin əsas məqsədi mümkün qədər sadə yollarla daha geniş kütlələrin diqqətini çəkməkdir və sosial xarakterli hadisələr bunun üçün ən ideal fürsətdir.
Qiymətə bax, məhsulun qiymətini ölç! – Chivas Regal effekti adlı yazımızı oxumaq üçün bura daxil olun.
