Beynəlxalq Kosmik Stansiya (ISS) 20 ildir dünyanın ən nadir laboratoriyası olaraq fəaliyyət göstərir və yüzlərlə elmi təcrübələrlə kosmonavtlara ev sahibliyi edir. İndi isə stansiyanın əsas operatorlarından biri olan NASA, ISS-də ən böyük ticari fəaliyyətlərindən birinə hazırlaşır.
Estée Lauder, yeni formula ilə hazırlanan qulluq məhsullarını Beynəlxalq Kosmik Stansiyaya (ISS) göndərmək və kosmonavtların yer çəkimi olmayan bir mühitdə məhsulun şəkillərini və videolarını çəkmələri üçün NASA ilə əməkdaşlıq edir.
CNN International-a danışan NASA sözcüsü bu ay kosmik stansiyaya təxminən 10 şüşə Estée Lauder dəriyə qulluq serumunun göndəriləcəyini açıqladı.
Razılaşmaya əsasən, kosmonavtlar məhsulun görüntülərini çəkmək üçün dörd saatdan çox vaxt sərf edəcəklər. New Scientist xəbər verir ki, məhsulları ISS-ə 3600 kiloqram əlavə məhsul götürəcək olan Northrop Grumman Cygnus kosmik gəmisi ilə göndərilməsi 128 min dollara başa gələcək. Bundan əlavə, Estée Lauder kosmonavtların bu kampaniyaya sərf etdikləri hər saat üçün 17.500 dollar ödəyəcək.
Ancaq kosmonavtların özləri məhsulun reklamlarında yer almayacaqlar. Çünki kosmik agentliyin siyasi etikası kosmonavtların bu kimi marketinq təşəbbüslərində iştirak etməsinə icazə vermir.
Estée Lauder əməkdaşlığı, NASA-nın kosmik layihələrə özəl sektor xərclərini təşviq etmək üçün etdiyi səylərin nəticələrindən biridir. Kosmik agentliyin stansiyanı ticariləşdirmək səyləri arasında reklam və marketinqdən başqa turizm kimi istirahət və əyləncə məqsədli fəaliyyətlər də yer alır.
Son bir neçə ildə NASA, ISS-nı marketinq və əyləncə məqsədli istifadə üçün özəl şirkətlərə açaraq vəsait toplamağa çalışdı. Buradan əldə olunan gəlirlərin ISS-nın baxım və təmirinə xərclənəcəyi açıqlandı.
May ayında Tom Cruise, ISS-də növbəti filmini çəkmək üçün rejissor Doug Liman ilə birlikdə çalışdığını elan etdi. Space Hero Inc. adlı şirkət, 2023-cü ildə ISS-ə səyahət etmək üçün bir qrup yarışmacıdan birinin seçilməsi ilə kosmosda ilk Reality TV şousunu çəkməyi planlaşdıqdığını açıqladı.
2001-ci ildə Pizza Hut, ISS-də işləyən rus kosmonavtı Yuri Usachov-a bir tədarük raketi ilə pizza təslim etmişdir.
